Ս.թ. հունիսի 16-18-ը Ծաղկաձորում անցկացվել է եռօրյա աշխատանքային հագեցած օրակարգով «Նորարար գրադարաններ 2021» աշխատաժողովը, որին մասնակցել են գրադարանների ավելի քան 35 աշխատակից Երևանից և հանրապետության տարբեր մարզերից:
Այս ամենամյա գրադարանային ֆորումները Հայաստանում սկիզբ են առել 2017թ-ից՝ ԱՄՆ-ի դեսպանատան տեղեկատվական ռեսուրսների կենտրոնի նախաձեռնությամբ, որոնց նպատակն է աջակցել Հայաստանի հանրային և համալսարանական գրադարաններում աշխատանքի նորարար մեթոդների ներդրմանը: Աշխատաժողովի բանախոսներն անդրադարձել են այնպիսի արդիական հարցերի, ինչպիսիք են գրադարանային պաշարների թվայնացումն ու շտեմարանների ձևավորման ժամանակակից միջոցների կիրառումը, գրադարանային մարքեթինգի, հանրության հետ կապերի և սոցիալական հարթակներում գրադարանների դրական իմիջի ձևավորումը: Ցուցադրվել են եռաչափ տպագրության և մոդելավորման սարքն իր աշխատանքային ընթացքում և 3D տպիչով ստեղծված առարկաներ: Ծավալվել են գրադարաններում ստեղծարար տեխնոլոգիաների կիրառման, փաստաթղթերի թվայնացման և էլեկտրոնային գրքի ձևաչափերի, էլեկտրոնային ընթերցող սարքերի, գրադարաններում հեղինակային իրավունքի պահպանման, անձի ազատ տեղեկատվություն ստանալու իրավունքին առնչվող հարցերի վերաբերյալ քննարկումներ:
Աշխատաժողովին մասնակցել են նաև Նորամուծության և ձեռներեցության ազգային կենտրոնի գիտատեխնիկական գրադարանի աշխատակիցներ Մարգարիտա Մանուկյանը և Գյումրու մասնաճյուղից Անահիտ Կարապետյանը:
Մարգարիտա Մանուկյանը իր հակիրճ ելույթում ներկայացրել է Գիտատեխնիկական գրադարանի նորարարական ծառայությունները:
Այսպիսի աշխատաժողովների դերը կարևոր է մասնագիտական փորձի և գիտելիքների փոխանակման, ինչպես նաև գրադարանային հանրության միջև փոխադարձ կապեր հաստատելու և լավագույն ավանդույթներ ձևավորելու հարցում:
#library_innovation_workshop2021
ՆՁԱԿ_ՊՈԱԿ #Գիտատեխնիկական_գրադարան
