ՆՁԱԿ
   
 

Գիտական աշխարհ

Գիտնականներն առաջին անգամ ամբողջությամբ վերծանել  են մարդու քրոմոսոմը

Մարդու գենոմի հետազոտությունների ամերիկյան ազգային ինստիտուտի (NHGRI) գիտնականները Կալիֆոռնիայի համալսարանի Սանտա Կրուզ գենոմիկայի ինստիտուտի գործընկերների հետ համատեղ առաջին անգամ ներկայացրել են մարդու X քրոմոսոմի ամբողջական հաջորդականությունը։ «Այս նվաճումը նոր դարաշրջան է բացում գենոմիկայի ուսումնասիրության մեջ»,- ասել են գիտնականները։ Նախագիծը կյանքի է կոչվել նանոծակտկեն հաջորդականացում (nanopore sequencing) անվամբ նոր տոխնոլոգիայի շնորհիվ, որն, ըստ էության, գենոմի ուսումնասիրման ամենաարդիական մեթոդն է։ Այն ապահովում է  հաջորդականության տվյալների առավել համապարփակ ընթերցում։ Ստեղծվել է նաև հաջորդականությունների մեծ թվով հատվածների հավաքման ծրագիր, որի շնորհիվ հետազոտողներն այլևս ստիպված չեն լինելու կարդալ միայն կարճ հատվածներն ու դրանք համադրել միմյանց հետ։ Մարդու գենոմի հաջորդական բացերը լրացնելով՝ գիտնականները հնարավորություն կունենան բացահայտելու հաջորդականության տատանումների և որոշակի հիվանդության միջև առկա կապը, ինչպես նաև՝ պատասխանել կենսաբանության և մարդու էվոլյուցիայի վերաբերյալ մի շարք հարցերի։ Թեև ԴՆԹ հաջորդականացման տեխնոլոգիաներն ունեն ավելի քան քսան տարվա պատմություն, այնուամենայնիվ դրանցում առկա են հարյուրավոր բացեր, որոնք կարող են ներառել ֆունկցիոնալ տարրեր՝ կապված որոշակի հիվանդությունների հետ: