AESA - Armenian Engineers & Scientists of America-Ի 2023 ԹՎԱԿԱՆԻ ԱՄԵՆԱՄՅԱ ԳԻՏԱԿԱՆ 22-ՐԴ ՕԼԻՄՊԻԱԴԱՅԻ ՄՐՑԱՆԱԿԱԲԱՇԽՈՒԹՅՈՒՆ

Մայիսի 19-ին ՀՀ էկոնոմիկայի նախարարության Նորամուծության և ձեռներեցության ազգային կենտրոնում տեղի ունեցավ Ամերիկահայ գիտնականների և ճարտարագետների ընկերակցության (AESA) 2023 թվականի ամենամյա գիտական 22-րդ օլիմպիադայի մրցանակաբաշխությունը:

Օլիմպիադայի նպատակն էր սովորողների շրջանում խթանել հետաքրքրությունը ճարտարագիտության և գիտությունների նկատմամբ, մենթորության, ուսուցման տարբեր հնարավոությունների, այդ թվում նաև կրթաթոշակների միջոցով նպաստել նրանց գիտելիքների ձեռք բերմանը դասի սահմաններից դուրս:

Մրցանակաբաշխությանը ներկա էին Կրթության, գիտության, մշակույթի և սպորտի նախարարի տեղակալ Արաքսիա Սվաջյանը, Ամերիկահայ գիտնականների և ճարտարագետների ընկերակցության հայաստանյան ներկայացուցիչ Վարդան Գևորգյանը և ուրիշներ:

Նախարարի տեղակալ Արաքսիա Սվաջյանը և Կենտրոնի տնօրեն Հայկ Մարգարյանը իրենց խոսքում կարևորեցին նախագծերի իրականացման դերը, սովորողների հետազոտական կարողությունների զարգացումը, որը հետագայում կարող է նպաստել Հայաստանում գիտության զարգացմանը, դրանով հանդերձ նաև գյուտերի առևտրայնացման հնարավորությունների մեծացմանը, ինչը Նորամուծության և ձեռներեցության ազգային կենտրոնի զարգացման ենթակա ուղղություններից մեկն է համարվում:

Օլիմպիադան իրականացվել է ապրիլի 15-16-ին, որին մասնակցել են 133 սովորող Երևանի և ՀՀ մարզերի 37 դպրոցներից: Ներկայացվել է 66 թիմային և անհատական նախագիծ ուսուցիչների ղեկավարմամբ, որի արդյունքում հաղթող են ճանաչվել 55 սովորող:

Միջոցառմանը ներկա էին ավելի քան 250 սովորող և ուսուցիչներ: Նախարարի տեղակալ Արաքսիա Սվաջյանը և Կենտրոնի տնօրեն Հայկ Մարգարյանը հաղթող սովորողներին և նախագծերի ղեկավար ուսուցիչներին հանձնեցին մրցանակներ և կրթաթոշակներ, իսկ մյուսներին՝ մասնակցության վկայականներ:

Մրցանակներ ստացան նաև «Շիրակացու ճեմարան» միջազգային գիտակրթական համալիրը՝ որպես լավագույն դպրոց և Վանաձորի թիվ 21 հիմնական դպրոցի քիմիայի և կենսաբանության ուսուցիչ Նելլի Ստեփանյանը՝ որպես լավագույն ուսուցիչ:

Միջոցառման ամբողջական նկարները կարող եք տեսնել հետևյալ հղումով https://drive.google.com/.../1NGyB1UEa-DhUlt3ohR...